គន្លឹះ​ទំាង ៥ ចំណុចដែលជួយអោយអ្នកធ្វើការ​បែបវៃឆ្លាត​ដោយ​ប្រើ​កម្លាំងតិច

ចែករំលែក ជំនឿ ជីវិត

ពាក្យថាធ្វើការបែបវៃឆ្លាតអាច​មានន័យផ្សេងគ្នាសម្រាប់​មនុស្សពីម្នាក់ទៅម្នាក់ទៀត​អាស្រ័យលើការឱ្យនិយមន័យ​ពាក្យជោគជ័យរបស់គេ​។ ប៉ុន្តែបើនិយាយជារួម ធ្វើការបែបវៃឆ្លាតគឺ​ការស្គាល់ចំណុច​ខ្លាំងរបស់ខ្លួនឯង និងបង្កើត​បណ្តាញទំនាក់ទំនង​ត្រូវដើម្បីសម្រេច​គោលដៅក្នុងវិធីដែលឆាប់​បំផុតនិងមាន​ប្រសិទ្ធភាពបំផុត​។ នេះជាគន្លឹះ​ទាំង៥ដែល​អ្នកត្រូវការដើម្បី​បង្កើនភាពវៃឆ្លាតក្នុងការងារ​​៖

 

១/ កំណត់ពេលវេលាធ្វើការ

លោកស្រី Jami Novak ជាអ្នកនិពន្ធ​គ្រូបង្រៀន​ខាងគ្រប់គ្រង​ពេលវេលាបង្ហាញ​ថាមានមនុស្ស​តិចណាស់ដែល​កំណត់ពេលវេលា​ធ្វើការដោយខ្លួនឯង។ បើអ្នក​ចេះកំណត់ពេល​វេលាធ្វើការនីមួយៗ​បានកាន់​តែច្បាស់លាស់​និងមានសុក្រិតភាព អ្នកនឹងស្គាល់​ខ្លួនឯងកាន់ច្រើន​និងដឹងច្បាស់ថាកិច្ចការប្រភេទ​ណាត្រូវការពេលយូរ​ឬឆាប់ប៉ុនណា។ ជំនាញនេះពិត​ជាចាំបាច់សម្រាប់មនុស្ស​ដែលមានការងារ​ច្រើនត្រូវបំពេញ​ក្នុងមួយថ្ងៃៗ​ដែលគេត្រូវ​ការរៀប​ចំផែនការណ៍​ជាមុន​។

 

២/ ប្រើប្រាស់GPS

GPS​ក្នុងទីនេះមិនមែនសំដៅ​លើប្រព័ន្ធតាមដានទីតាំង​ភូមិសាស្រ្តនោះទេ តែជាពាក្យកាត់​របស់គោលដៅ គោលបំណង និងទំហំការងារ (goal, purpose, scope)​។ លោក Mitzi Weinman ប្រធានក្រុមហ៊ុន TimeFinder និងជាអ្នកនិពន្ធសៀវភៅ It’s AboutTime!  Transforming Chaos into Calm, A to Z ពន្យល់ថា​GPS នេះជាប្រព័ន្ធចង្អុលទិសដៅ​ដែលជួយយើងឱ្យ​ចេញពីកន្លែងមួយ​ទៅកន្លែងមួយទៀត ​ហើយបើប្រើប្រាស់ក្នុង​ការចាត់ចែងការងារ​ឱ្យអ្នកដទៃធ្វើជំនួស វានឹងជួយ​អ្នកនិង​មនុស្សដែលអ្នកប្រើ​នោះស្ថិតនៅលើផ្លូវ​ត្រូវទាំងអស់គ្នា​។

 

៣/ គ្រោងគិតអំពីពេលវេលា

អ្នកជំនាញខាងផលិតភាព និងជាស្ថាបនិកក្រុមហ៊ុន Productivityist លោក Mike Vardy និយាយថា​ការគ្រោងគិត​អំពីពេលវេលា គឺការ​រំដោះចិត្តរបស់​អ្នកទៅគិតផ្តោត​លើកិច្ចការសំ​ខាន់ដើម្បីភាព​រីកចម្រើន​ក្នុងជីវិត​។ ការគ្រោងគិត​អំពីពេលវេលា​គឺជាមធ្យោបាយ​អស្ចារ្យក្នុងការ​ជៀសវាងពីការ​សម្រេចចិត្តច្រើនពេក​។ ការគ្រោងគិតអំពី​ពេលវេលាក៏អាច​ជួយធានា​ដល់តុល្យភាព​ការងារ​និងជីវិតដែរ​។ ឧទាហរណ៍ថា​អ្នកគ្រោង​គិតយករាល់ល្ងាច​ថ្ងៃសុក្រជាពេលសម្រាប់​មិត្តភក្តិ ហើយរាល់ថ្ងៃសៅរ៍​ជាពេលសម្រាប់គ្រួសារ​។ តាមរយៈការគ្រោង​គិតអំពីពេលវេលា​និងផ្តល់អាទិភាព​ទុកជាមុនដូច្នេះ អ្នក​អាចមាន​សេរីភាពនិង​ភាពបត់បែន​បានច្រើន​ក្នុងការ​រក្សាតុល្យភាព​ជីវិតនិងការងារ​។

 

៤/ បង្កើតយុទ្ធសាស្រ្តថ្មីក្នុងការផ្ញើអ៊ីម៉ែល

អ៊ីម៉ែលជា​ចោរស៊ីពេលវេលា​និងផលិតភាព​យ៉ាងច្រើន​របស់អ្នក​ធ្វើការ​ក្នុងការិយាល័យ​។ ជា​ញឹកញាប់​មនុស្សយើង​ធ្វើការច្រើន​ក្នុងពេលតែមួយ ហើយ​មិនដឹងថា​ខ្លួន​កំពុងតែ​ធ្វើបែប​នោះផង ដោយសារ​ការរំខាន​ពីបច្ចេកវិទ្យា​។ ឧទាហរណ៍ថា​អ្នកកំពុងតែគិត​គម្រោងសំខាន់មួយ​ស្រាប់តែមាន​ការរំខាន​ពីអ៊ីម៉ែលដែល​ធ្វើឱ្យឈប់​គិតហើយទៅអានសារ​នោះភ្លាម​។ ក្រោយពី​អានសារ​នោះរួចហើយ អ្នក​ក៏ចាប់​ផ្តើមគិត​ថាត្រូវឆ្លើយតប​ភ្លាមឬចាំ​ពេលក្រោយ​។ ការងារ​ចម្រុះក្នុងពេល​ទន្ទឹមគ្នាបែបនេះ​អាចធ្វើឱ្យអ្នកមាន​អារម្មណ៍ថាធ្វើការច្រើន​និងរវល់ជានិច្ចព្រោះ​ត្រូវដកឃ្លាពីការងារ​មួយទៅធ្វើការងារ​មួយទៀត ហើយទីបំផុត​មិនសូវទទួល​បានផលិតភាព ឬលទ្ធផលប៉ុន្មានទេ​។ ក្នុងយុទ្ធ​សាស្រ្តថ្មី អ្នកត្រូវ​បង្កើតពេលវេលា​កំណត់ជាក់លាក់​ណាមួយដើម្បីអាន​និងឆ្លើយតបអ៊ីម៉ែល​ដោយមិនត្រូវបើកមើល​នៅគ្រប់ពេលដែល​មានសញ្ញាប្រាប់ថាមាន​អ៊ីម៉ែលនោះទេ​។

 

៥/ សរសេរកំណត់ចំណាំសម្រាប់ខ្លួនឯង

ពេលខ្លះយើងមិន​អាចគេចចេញ​ពីការរំខាននិងកិច្ចការ​កំប៉ិកកំប៉ុក​ដែលស៊ីពេលនោះទេ​។ នៅពេលណាដែលអ្នក​ត្រូវផ្អាកការងារកំពុង​តែធ្វើមុនពេលបញ្ចប់ អ្នកត្រូវសរសេរ​កំណត់ចំណាំសម្រាប់រំលឹកខ្លួន​ឯង​។ កំណត់ចំណាំនេះគួរតែបញ្ជាក់​លម្អិតត្រង់ចំណុចដែលអ្នក​ផ្អាកនោះ ដើម្បីអ្នកអាច​ចាប់ផ្តើមបានត្រង់​ចំណុចនោះវិញភ្លាមៗ​ដោយមិនចាំបាច់ចំណាយពេល​នឹករកសាវតាឬចង្វាក់​នៃកិច្ចការនោះ​តាំងពីដើមមកវិញ​។

 

ប្រែសម្រួល​៖ វេហា

ប្រភព​៖ Forbes

Leave a Reply

Your email address will not be published. Required fields are marked *