បញ្ឈប់​​តែ​៤​យ៉ាង​នេះ​បាន ជីវិត​មនុស្ស​ស្រី​​អាច​​មាន​​សេចក្ដី​សុខ​ច្រើន​ណាស់

ស្នេហា

ជីវិត​មនុស្ស​យើង​នេះ ពី​មួយ​ថ្ងៃ​ទៅ​មួយ​ថ្ងៃ​តែង​មាន​រឿង​ជា​ច្រើន​​ដែល​ត្រូវ​គិត ប៉ុន្តែ​​ដឹង​ឬទេ​ថា​អ្វី​ៗ​ជា​ច្រើន​ដែល​យើង​កំពុង​តែ​គិត​នោះ វា​គឺ​ជា​​ការ​គិត​ក្នុង​ផ្លូវ​ល្អ ឬ​ក្នុង​ផ្លូវ​អាក្រក់? រឿង​ខ្លះ​គិត​ច្រើន​ក៏​គ្មាន​ប្រយោជន៍ មាន​តែ​បង្អាក់​ជីវិត​ឲ្យ​ថយ​ក្រោយ​ជាង​អ្នក​ដទៃ​ទទេ​ៗ។

ការ​គិត​គឺ​ជា​តួ​​កំណត់​ជីវិត​ដ៏​សំខាន់ អ្នក​ដែល​មាន​ការ​គិត​ល្អ​នឹង​អាច​នាំ​ជីវិត​ខ្លួន​ទៅ​ជួប​តែ​រឿង​ល្អ​ៗ ដោយ​ឡែក​​ពេល​​នេះ​អ្នក​ដែល​មាន​អារម្មណ៍​ថា​មិន​រីករាយ​នឹង​ជីវិត​ខ្លួន​ឯង មាន​អារម្មណ៍​ថា​ជីវិត​មិន​រីក​ចម្រើន អាច​សាក​ល្បង​មក​ពិចារណា​ទាំង​អស់​គ្នា​ថា​យើង​មាន​ចំណុច​ប៉ុន្មាន​យ៉ាង​ខាង​ក្រោម​ក្នុង​ខួរ​ក្បាល​ដែរ​ឬ​ក៏​អត់ បើ​មាន​ត្រូវ​ប្រញាប់​កម្ចាត់​ចេញ​ភ្លាម។

១. គិត​ប្រៀបធៀប​ខ្លួន​ឯង​ជាមួយ​អ្នក​ដែល​មាន​ច្រើន​ជាង “ហេតុ​អី​ម្នាក់​នោះ​ស្អាត​ ហេតុ​អី​ម្នាក់​នោះ​មាន ហេតុ​អី​ម្នាក់​នោះ​មាន​ជីវិត​ល្អ​ម្ល៉េះ ហើយ​មើល​មក​ខ្ញុំ​ចុះ… “ មើល​ទៅ​គេ​និយាយ​ពី​ថា​ស្អី​ក៏​មាន តែ​កុំ​ឱន​មុខ​មើល​ខ្លួន​ឯង​ពេល​ណា​ក៏​ដក​ដង្ហើម​ធំ​ដែរ… បញ្ឈប់​ការ​គិត​របៀប​នេះ​ទៅ​ណា​ស្រី​ៗ ឈប់​ឥលូវ​នេះ​តែ​ម្ដង ព្រោះ​ហេតុ​អ្វី ព្រោះ​ការ​គិត​បែប​នេះ​គឺ​ជា​ចំណុច​ចាប់​ផ្ដើម​ដែល​នាំ​ឲ្យ​ខ្លួន​ឯង​ធ្លាក់​រណ្ដៅ កើត​ក្ដី​តូច​ចិត្ត អន់​ចិត្ត​នឹង​ជីវិត​ខ្លួន​ឯង រហូត​អស់​កម្លាំង​ចិត្ត​នឹង​បន្ត​ដំណើរ​ជីវិត​ទៅ​មុខ … គិត​ប៉ុណ្ណេះ​ក៏​​ចង់​ធ្លាក់​ទឹក​ចិត្ត​បាត់​ទៅ​ហើយ។ ជំនួស​ឲ្យ​ការ​រក​មើល​តែ​ភាព​ឥត​ខ្ចោះ​របស់​អ្នក​ដទៃ​ ហេតុ​អ្វី​យើង​មិន​ងាក​មក​មើល​​អ្វី​ដែល​យើង​មាន ហើយ​ធ្វើ​ឲ្យ​កាន់​តែ​សម្បូរ​បែប​ថែម​ទៀត​ទៅ? មាន​មោទនភាព​​លើ​ខ្លួន​ឯង ពេញ​ចិត្ត​អ្វី​ដែល​ខ្លួន​ឯង​មាន​ ហើយ​សម្លឹង​​ចុះ​ក្រោម​មើល​អ្នក​ដែល​មាន​មិន​ដល់​យើង​ខ្លះ រួច​ហើយ​យើង​នឹង​ឃើញ​ថា​យើង​ក៏​មិន​បាន​អន់​ ឬ​ខ្វះ​ខាត​គ្រប់​យ៉ាង​នោះ​ទេ។ គ្មាន​ជីវិត​អ្នក​ណា​ល្អ​បំផុត​នោះ​ទេ តែ​អ្វី​ដែល​ល្អ​បំផុត​គឺ​ការ​ដែល​យើង​ពេញ​ចិត្ត​នឹង​ជីវិត​ខ្លួន​ឯង​​តែ​ប៉ុណ្ណោះ។

២. គិត​ថា​ខ្លួន​ឯង​ធ្វើ​មិន​បាន ខ្លួន​ឯង​មិន​គួរ​ធ្វើ

មើល​ងាយ​ខ្លួន​ឯង​បែប​នេះ​យូរ​ហើយ​នៅ? ហើយ​ចង់​មើល​ងាយ​ខ្លួន​ឯង​អីចឹង​ទៀត​ដល់​ពេល​ណា? ជា​រឿង​ធម្មជាតិ​ហើយ​ដែល​​មិន​​ចូលចិត្ត​ឲ្យ​អ្នក​ដទៃ​មក​មើល​ងាយ​យើង តែ​យើង​បែរ​ជា​មក​មើល​ងាយ​ខ្លួន​ឯង​ទៅ​វិញ។ នារី​ៗ​ដឹង​ទេ​ថា​គិត​បែប​នេះ​គឺ​គ្រោះថ្នាក់​ខ្លាំង​ណាស់​សម្រាប់​ជីវិត​យើង ក្រៅ​ពី​ធ្វើ​ឲ្យ​យើង​​មើល​ទៅ​ជា​​មនុស្ស​ស្រី​ដែល​មាន​ជំនឿ​ចិត្ត​ និង​គ្មាន​អ្នក​ណា​ចាប់​​អារម្មណ៍​ហើយ វា​ក៏​រារាំង​ភាព​ជោគជ័យ​​របស់​យើង​ដែរ។ ដែល​​មួយ​​ជីវិត​នេះ​យើង​មិន​បាន​អ្វី​ដូច​បំណង​សូម្បី​ម្ដង មិន​ទទួល​បាន​ជោគជ័យ​សូម្បី​ម្ដង ក៏​ព្រោះ​តែ​យើង​មាន​ការ​គិត​បែប​នេះ​។ ដើម្បី​ជីវិត​ប្រសើរ​ឡើង ដើម្បី​ទៅ​រក​ភាព​ជោគជ័យ​ដែល​រង់​ចាំ​យើង​នៅ​ខាង​មុខ យើង​ត្រូវ​ជឿ​ជាក់​មុន​ជា​និច្ច​ថា​យើង​អាច​ធ្វើ​បាន​តាម​អ្វី​ដែល​ចិត្ត​យើង​ត្រូវ​ការ។ មូលហេតុ​ដែល​យើង​ធ្វើ​អ្វី​មួយ​មិន​បាន គឺ​ដោយ​សារ​តែ​​ចិត្ត​របស់​យើង​មិន​បាន​ត្រូវ​ការ​វា​​ឲ្យ​ខ្លាំង​គ្រប់គ្រាន់ និង​មិន​បាន​ព្យាយាម​ឲ្យ​ដល់​ទី​បំផុត។​​

៣. ខ្លាច​ការ​ផ្លាស់​ប្ដូរ អ្នក​ខ្លះ​ធ្លាប់​នឹង​ការ​រស់​នៅ​បែប​ដដែល​ៗ ទី​កន្លែង​ដដែល ជាមួយ​មនុស្ស​ដដែល​ៗ រហូត​ក្លាយ​ជា Comfort Zone ឬ​កន្លែង​ដែល​យើង​ចង់​តែ​នៅ​មិន​ចង់​ទៅ​ណា។ ប៉ុន្តែ​គ្រប់​គ្នា​ដឹង​ទេ​ថា​វា​គឺ​ជា​រឿង​អាក្រក់​បំផុត ព្រោះ​ពិភពលោក​នេះ​ប្រែប្រួល​រៀងរាល់​ថ្ងៃ ក្នុង​ជីវិត​យើង​ក៏​ត្រូវ​មាន​ការ​ប្រែប្រួល​ចៀស​មិន​ផុត។ យើង​ត្រូវ​លា​ដៃ​ទទួល​វា​ឲ្យ​បាន និង​ត្រូវ​ចេះ​ស្វះស្វែង​រក​ការ​ផ្លាស់​ប្ដូរ​ដើម្បី​ទទួល​បាន​ឱកាស​កាន់​តែ​ប្រសើរ​ក្នុង​ជីវិត។ អ្នក​ខ្លះ​ធុញ​ទ្រាន់​នឹង​ការងារ​ខ្លះ​ទៅ អ្នក​ខ្លះ​ធុញ​នឹង​សង្សារ​មិន​ល្អ ប៉ុន្តែ​ក៏​សម្រេច​មិន​ដើរ​ចេញ​ទៅ​ណា​ទាំង​អស់ ព្រោះ​ខ្លាចការ​ចាប់​ផ្ដើម​ថ្មី បើ​ទោះ​​នៅ​កន្លែង​ដដែល​នេះ​គ្មាន​ក្ដី​សុខ តែ​ក៏​សុខ​ចិត្ត​ទ្រាំ ព្រោះ​​វា​ស៊ាំ​​ទៅ​ហើយ។ តែ​ជីវិត​មនុស្ស​យើង​ខ្លី​ណាស់​ណា​ស្រី​ៗ អីចឹង​រវល់​តែ​បង្ហិន​ពេល​វេលា​ជាមួយ​ការ​ស៊ាំ​ដែល​មិន​មែន​អ្វី​យើង​ចង់​បាន​បែប​នេះធ្វើ​អី?

បើ​ជីវិត​ដដែល​ៗ​នេះ​មិន​ធ្វើឲ្យ​ជីវិត​យើង​រុងរឿង​បាន​ទេ ដល់​ពេល​ហើយ​ដែល​យើង​ត្រូវ​ផ្លាស់​ប្ដូរ​អ្វី​មួយ ដើម្បី​ជីវិត​យើង​ល្អ​ជាង​នេះ​ទៅ​អនាគត។

៤. ពូកែ​ច្រណែន

នៅ​ពេល​ឃើញ​អ្នក​ដទៃ​មាន​ក្ដី​សុខ គេ​ជោគជ័យ ហើយ​យើង​ច្រណែន​គេ យើង​មាន​អារម្មណ៍​ល្អ​មែន​ទេ? ពិត​ប្រាកដ​ណាស់ គឺ​អត់​ទេ! ការ​ច្រណែន​មិន​បាន​ធ្វើ​ឲ្យ​យើង​មាន​អារម្មណ៍​ល្អ​​ឡើយ ហើយ​បើ​យើង​មាន​ការ​គិត​បែប​នេះ​កាន់​តែ​ច្រើន​ទៀត វា​នឹង​​ជះ​ឥទ្ធិពល​ដល់​ទង្វើ​របស់​យើង​​ដែល​បង្ហាញ​ចេញ​​ច្បាស់​ៗ​ថា​យើង​អគតិ​ចំពោះ​អ្នក​ដទៃ។ គ្មាន​នរណា​ចូលចិត្ត​មនុស្ស​ពូកែ​ច្រណែន​ទេ ក្រៅ​ពី​វា​​ធ្វើឲ្យ​យើង​គ្មាន​ក្ដី​សុខ​ហើយ វា​ក៏​ធ្វើ​ឲ្យ​មនុស្ស​ជុំវិញ​ខ្លួន​យើង​មាន​អារម្មណ៍​មិន​ល្អ​ចំពោះ​យើង​ទៀត។ សាក​ល្បង​ផ្លាស់​ប្ដូរ​អារម្មណ៍​ច្រណែន​ជោគជ័យ​អ្នក​ដទៃ​​នេះ​​មក​ជា​កម្លាំង​​ជំរុញ​ទឹក​ចិត្ត​ខ្លួន​ឯង​វិញ​ប្រសើរ​ជាង ក្រៅ​ពី​ធ្វើ​ឲ្យ​ខ្លួន​ឯង​គ្មាន​ទុក្ខ​ហើយ យើង​ក៏​ទទួល​បាន​កម្លាំង​​ជំរុញ​ចិត្ត​ឲ្យ​ខំ​ប្រឹង​ដើម្បី​ជោគជ័យ​ថែម​ទៀត។ នៅ​ពេល​យើង​លះ​បង់​ចិត្ត​ច្រណែន​បាន​ហើយ ការ​អាច​អបអរ​អ្នក​ដទៃ​​ដោយ​ចិត្ត​ស្មោះ​ក៏​នឹង​ធ្វើ​ឲ្យ​ផ្លូវ​ចិត្ត​យើង​មាន​ក្ដី​សុខ និង​អាច​ក្លាយ​ជា​មនុស្ស​ជា​ទី​ស្រឡាញ់​របស់​​បុគ្គល​ទូទៅ​ផង​ដែរ។ ការ​គិត​ល្អ គិត​ក្នុង​ផ្លូវ​វិជ្ជមាន ​នឹង​ធ្វើ​ឲ្យ​យើង​ក្លាយ​ជា​មនុស្ស​ល្អ​ គួរ​ឲ្យ​ចង់​រាប់​អាន គួរ​ឲ្យ​ចង់​ចូល​ជិត។ ក្រៅ​ពី​ធ្វើ​ឲ្យ​ជីវិត​ល្អ​ប្រសើរ​ហើយ​ វា​ក៏​ជា​មន្ត​ស្នេហ៍​មួយ​ទៀត​របស់​មនុស្ស​ស្រី​យើង​ក៏​ថា​បាន។ ចាប់​ពី​ពេល​នេះ​​ទៅ​យើង​នឹង​កាន់​តែ​​​មើល​ឃើញ​តម្លៃ​ខ្លួន​​ឯង យើង​នឹង​កាន់​តែ​មាន​ជំនឿ​ចិត្ត យើង​នឹង​ហ៊ាន​ផ្លាស់​ប្ដូរ​ដើម្បី​រក​អ្វី​ដែល​ប្រសើរ​ជាង ហើយ​យើង​នឹង​​យក​រឿង​ល្អ​ៗ​របស់​អ្នក​ដទៃ​មក​ធ្វើ​ជា​កម្លាំង​បណ្ដាល​ចិត្ត​ដើម្បី​ធ្វើ​ឲ្យ​ជីវិត​កាន់​តែ​ប្រសើរ ៕

ប្រភព : Kanha

Leave a Reply

Your email address will not be published. Required fields are marked *